做個100秒的嫖客．完

走完其他四個出口崗位，我開始有啲攰同肚餓。始終幾乎由凌晨忙到依家，差不多廿四小時無食嘢，於是我到咗食堂。

食堂已經坐滿晒手足，津津有味咁食緊畢業生準備嘅飯餸。我行到點餐櫃台，見到雖然唔係咩珍饈百味，但有菜有肉有飯，已經比我平時食嘅好。

「你去攞隻碟，我潷一份俾你。」櫃台後嘅女手足指指附近放滿餐具嘅矮櫃對我講。我好聽話咁行過去拎咗隻碟同匙羹，遞俾個女仔幫我裝餸裝飯。

「唔好意思，廚房嘅手足話要慳住食，無得添飯添餸。」

「無問題，已經好夠。」

「要飲啲乜？」

「俾包朱古力我，唔該。」

佢照我意思遞咗包俾我：「你嘅。」

「多謝哂。」

見食堂無乜位，我就攞住個餐盤到一笪比較偏僻嘅草地，靜靜地食飯。食到差唔多時，我聽到有兩個人鬼鬼祟祟行過草地，攝咗入旁邊嘅小樹林內。

我又好奇又帶點懷疑，怕係外面嘅警察混咗入來，靜靜地跟咗入去，就見到佢哋喺一棵比較大同粗嘅樹下相對而立。

「我好驚……」一把女聲先開口。

「唔駛驚，有我陪你嘛。」一把男聲回答。

「我……我就係驚你……」女聲開始啜泣，「驚你有日會唔喺我身邊……」

「點會呢？」個男仔即刻攬實個女仔，「我一定會保護你。」

「但啲警察成班綠獸人咁，你點保護我？」

……

只有風吹過樹葉嘅「沙沙」聲……

……

良久，男仔才擠出一句話。

「義之所在，亦命之所在；一切遭遇同實踐，是義亦是命。」

「應承我……唔好離開我……」

「應承你，唔會離開你。」

我靜靜地行開，去返原先嘅草地，將飲管拮入紙包朱古力，啜咗幾口。

回想剛才男仔所講嘅「義」同「命」，好似同我原本嘅認知唔同。孟子講捨生取義；如果所講嘅「命」係生命或宿命，就唔係「是義亦是命」。或者闊啲去諗，「義」係應做嘅嘢，而「命」係命限、不能控嘅意思？

咁樣嘅話，又好似諗得通少少。我哋一班人做緊係應該去做嘅事，係「義之所在」；但我哋無能力去抵抗政府各方面嘅打壓，係「命之所在」。喺呢個大環境內，必先知命，先可以行義盡道，作出適當回應同選擇。

我飲完包朱古力，忽然諗起易拎。雖然我好想去搵佢，實實在在傾下計，甚至確認彼此嘅心意，但喺大家嘅背景呢個「命」之下，唔去搵佢似乎係「義」。

未食過煙，但呢個時候如果有一支，甚至一口，應該可以呼出大部分愁緒。

樹林中嘅男女小心地行返出嚟，佢哋見到我嚇咗一驚，我當無見到轉頭望返學校。

呢一晚除咗警笛聲外，一切都好靜。

之但係，靜，只有呢一晚。

往後嘅幾日，警察不斷從各個出入口佯攻。唔使多，十幾個攞住長盾喺幾十米前，就算唔做嘢企一陣撤退，已經令手足們非常緊張。當佢哋一次過排喺幾個出口前，更令所有手足疲於奔命。

更甚嘅係，佢哋唔單止朝早咁做，連夜晚都咁樣，結果大部分手足都無足夠休息。

久而久之，唔少人開始焦慮、暴躁、有氣無力，加上時間一長，食物開始短缺，三餐份量明顯地少咗三分一。

「情況唔係特別好……」第四日朝早畢業生同我講。

「我估只會愈來愈差……」

當日下午五點，警方每日會用揚聲器話如果投降行出校，係唔會被捕。對於我同其他已經同屋企決裂嘅人，當然唔會被動搖。但係，唔少手足依然有家可歸，喺愈來愈差嘅環境下，只會更想家。

結果我哋每朝見到嘅人愈來愈少；留守校園嘅一星期後，我估計無咗一半人。

「走咗嗰班正反骨仔！無道義！」

「少說話多做事喇，唔好怨咁多。」

「屌！你唔話嗰班逃兵，話我呢個留低嘅？！」先前講話嘅人用力將手上嘅工具揼落地下，「你既然做埋佢個份，唔差在做埋我個份！」然後就轉身走。

其他人只有默默地做埋佢嗰份。

第十日。

人數大約得返百幾人。

在場手足心知，外面嘅警察都計到。

所以，當下午六點時，西出口再一次駐重兵，我哋就感到今次係嚟真嘅。

我哋遠處見到裝甲車以稍稍落後嘅距離與水炮車並行。水炮車一邊向前駛，一邊將馬路上嘅磚陣沖散，好讓兩輛車可以暢通無阻地前行。

水炮車水缸嘅水最多可以用三分鐘，足夠將馬路上嘅磚同雜物清理得七七八八，而我哋只能夠白白地睇住我哋嘅防禦一點一點崩落。

三分鐘過後，水炮車射晒所有水，開始退後。裝甲車同後隨嘅防暴暢通無阻地接近我哋嘅守崗。

幾個擔任「火魔法」嘅手足首先衝咗出去，掟咗幾個汽油彈阻止防暴前進，但地上嘅水令汽油彈燒唔起應有嘅烈火，對來勢洶洶嘅防暴一啲驚嚇都無。

盾後嘅指揮官舉手叫停防暴前進，並右手一揚，十數枚催淚彈應聲射向喺守崗嘅我哋。成個出口即時煙霧瀰漫，全部手足爭相走避，無人能夠留守。

不一會，連串急促嘅腳步聲如大象操兵，響亮地往守崗衝過來。

「走呀！！」我聽到出面嘅火魔手足大叫。

然後，出口嘅障礙物火頭四起，火焰好快燒到一啲易燃嘅雜物，繼而木製嘅長櫈同檯、講台等，最後有如一道火牆隔住外面嘅警察。

校園守唔住，我唔會估唔到，但依然狠狠刺痛我。

「撤退呀！」我大叫。

其實，五個出口肯定有狗守住，我都唔知可以撤去邊，但呢樣嘢係我唯一可以做。

走返人校園中心嘅廣場，見到其他出口嚟嘅手足，個個驚惶失措，束手待擒咁款，而我又計無所出，開始後悔當時建議撤入大學。

「呢邊！」一把熟悉嘅聲音大嗌，望過去原來係畢業生，「快啲過嚟廚房！」

我同附近嘅手足聽到，立刻跟住佢走。十幾人穿過食堂、廚房、貨倉，嚟到平時貨車上落貨嘅地方。

「出咗閘門，爬過鐵絲網，走一段路就到殯儀館，到嗰度就安全。」畢業生說。

「你哋先走，我會幫你哋爬過鐵絲網。」我話。

跑到鐵絲網前，我同畢業生幫幾個手足跨到對面嘅細街，只要佢哋之後棄裝，應該可以避過警察嘅耳目。

本來相安無事，直至淨低我、畢業生，同一對男女手足。我哋先幫女手足爬上去，卻就喺女手足正要跨過錢絲網時，一班警察發現我哋，立刻如蟻見糖般湧過來，嚇得佢跌落地下。

「安妮！」把聲聽落好似之前喺樹林嘅男仔。

「海！我隻腳好痛，可能扭傷咗；」見到個女仔乸埋口面捏實腳踝，「唔好理我，快啲同佢哋走！」

「點得！？」阿海立刻扶起安妮，將佢揹起，「我應承過，唔會離開你！」

「點都好，快啲走！」我同畢業生催促。

我哋四人即刻奔回大學。

「如果俾我捉到條女，一定玩到佢對腳斷開都繼續玩！嘻哈哈哈！」我聽到身後警察大聲咁淫笑。

「我哋一定會出到去！」阿海一邊孭住安妮，一邊安慰，「有我喺度。」

「我哋依家點走？」我問。

「喺西南嘅渠口落去，沿下水渠走出大學。」畢業生答，「到咗出面睇下有無『家長』接應。」

「咁會唔會好危險？」我望望身邊嗰對情侶。

「唔好擔心我哋，就算受咗傷我都會搏，總好過落喺班狗手上。」

「我會保護你。」

「時間無多，快啲行動！」畢業生急忙催促。

於是，我哋四個人一邊躲避校內嘅警察，一邊走到一個隱蔽於大樓間嘅圓形渠口前。

我、畢業生同阿海三人見到一絲曙光，立刻用身上僅有嘅工具嘗試打開渠蓋。只不過厚重嘅鐵塊絲毫不動，無相應嘅工具根本打唔開。

「我去搵鐵筆或者撬棍。」畢業生話音未落就轉身走咗，得番我、阿海同安妮三人。

砰磅、砰磅……

我已經分唔到究竟係催淚彈、橡膠子彈定係真鎗實彈嘅聲音。

「如果落大雨點算？」我聽到安妮問阿海。

「淹死應該好過被捉到，」阿海答，「但至少可以同你長眠喺呢個城市之下。」

砰磅！

又一下鎗聲。

我抱住雙膝，挨過呢一聲恐懼。

瞥見阿海同安妮抱得好實。

『亂世中、有這一對……

毋用、氣體協助溢出眼淚……

絕地情侶。』

腦海出現咗呢首歌。

好幾次防暴喺我哋不足廿米前經過，幸好呢度夠黑睇唔到我哋。我係度諗，如果畢業生搵唔到工具，又或者返唔到嚟，我哋應該點。

喺第五下鎗聲之後，畢業生返咗嚟，手上有兩支鐵筆。

我哋忍住無大聲歡呼，立即去再試打開渠蓋。有咗兩支鐵筆，果然好易就打開咗個蓋。

「你哋先落去，」畢業生指住對情侶，「跟住到你，」然後指住我，「我會殿後。」

「我落去先，安妮你隻腳可以嗎？」

「依家無咁痛，但呢個時候就算斷咗都要頂硬上。」

當阿海同安妮消失於下水道口後，我同畢業生講：「你先走。」

「點解？」

「我講過會最後一個走。」

「依家唔係硬頸嘅時候，你仲後生，大把機會，唔好喺度被狗咬到！」

「就係因為我年輕，先要留喺度！」

「屌！」畢業生一拳打落我豬咀上，拉起我衣領說，「就係因為你年輕，走先嗰個係你！」

「如果唔係我呢班前人後知後覺，任由政府溫水煮蛙，呢五年嘅事根本唔會發生！」畢業生激動地講，「再者你依家廿幾歲，係黃金時期，被捉到唔俾佢哋玩死，都被十年刑期浪費大好青春！」

「你嘅責任係守到大學呢刻嘅精神，傳承落去！」

「咁你同我一齊走！」

「唔得！」畢業生斬釘截鐵，「被班防暴見到渠蓋開咗，就會通知出面嘅警察，到時唔止你哋，其他想用下水渠逃走嘅人都走唔到！」

「我唔可以就咁丟低你一個！」

「妖！」拉住我衣領嘅雙手用力拉我到渠口邊，然後往外一推。畢業生見我兩腳踏空，立刻放開手，我半個身即時跌入渠口。

我反射地扶住渠口嘅石屎地，雙腳搵到渠牆上落用嘅鐵枝，抬頭見畢業生居高而望並警告我：「唔好上返嚟，我會打返你落去！」

我喺呢個情況已經無得爭辯，只能講咗句……

「煲底見。」

「但願如此……」

畢業生見我爬咗落下水道，就急不及待將渠蓋關上。眼前頓時一片漆黑，伸手不見五指，我只係憑手腳去感覺鐵枝嘅存在，一路向下爬。

黑暗剝奪我對時間流逝嘅感覺，只知道當手指關節開始痛之前，我雙腳踏喺一潭水上。

腳踏實地後我立刻拎個電筒出嚟，白光照唔到渠蓋嘅底部，我慶幸自己呢幾個月來有健身鍛鍊抓力。

沿住下水道一直走，因為近來無乜落雨，無積到好多淤泥同沙石，減慢逃生速度；同時無雨水將道路上嘅垃圾沖落渠，發霉同壞臭味較輕，即使走快啲時呼吸都可以較順暢。

污水滴答滴答從渠頂滴落，喺呢個密封而睇唔到盡頭嘅圓柱內迴響不止，產生的共鳴大得令我諗起剛才嘅鎗聲。我掩住雙耳，搏命向前跑，電筒射出嚟嘅光不斷搖晃，完全唔能夠指引我嘅前路。

直至跑到上氣唔接下氣彎身不斷喘息嘅時候，搖晃嘅白燈光照到一串嵌喺渠牆嘅鐵枝，就同剛才爬落嚟嘅鐵枝一樣。

出口就係附近，但上面有咩等住我呢？

會係防暴？定係「家長」？

只能見步行步。

爬上鐵枝，頭頂上開始出現一點暗黃。愈爬上去，黃點愈來愈大。直到黃點寬過我膊頭，伸手可及之處。

我停咗落嚟靜聽，外面只有遠處傳來嘅吵鬧聲同警笛聲，附近唔似有人。我戰戰競競伸咗半個頭出嚟周圍望望，見到渠口喺一條後巷出口前，出面大街只有零星嘅汽車經過。

無防暴，無家長。

快手快腳除低咗一陣臭味嘅黑衫豬咀，正想將佢哋丟入水渠之前，一陣無力感湧上嚟。

今晚，我因為能力不足，放棄咗畢業生，放棄咗好似屋企嘅大學。如果我依家丟咗套裝備，就好似連自己都放棄埋。沉思之際，眼淚忽然想流出嚟。

唔可以流眼淚，唔可以喺呢個兵荒馬亂之時軟弱。

然而，就喺我忍住眼淚嘅時候，手竟然一軟，所有裝備被吸入下水渠。

噹、噹、噹……

然後無聲……

我腦內忽然一片空白，手不停咁震，身上只有底衫同跑步短褲，好似癮君子咁，搖搖晃晃行出大街。

無意間見到一對豬咀，係阿海同安妮嘅嗎？豬咀附近有一大灘血漬，係阿海同安妮嘅嗎？

如果唔係佢哋先行，佢哋唔會被防暴捉到；阿海唔會被打到頭破血流，安妮唔會被一大班警察污辱。

我放棄咗好多嘢，卻保護啲乜嘢… …

轉頭望見附近嘅舊樓，我見到一個陌生又熟悉嘅名字。

「香檳大樓」。

我唔想去搵佢，身體卻無理會我點諗，行咗上四樓，嚟到門牌十二號前。

門口無好似其他單位咁樣紅粉閃閃，亦無貼滿幾錢一Ｑ嘅價目表，低調得有點格格不入。

佢話過見到我之後，唔想再被人嫖，從眼前所見可能係真心話。

可能佢已經搬走咗。

之但係，我依然敲咗下門。

好讓我完全心死，孤獨空虛咁一個人瑟縮喺呢個城市。

過咗一陣，門無開。

我低頭呼咗口氣，轉身離開。

「係你？」行到下一個門口時，有一把女聲叫住我。

我抬頭直望，見到著住便服嘅易拎企喺我面前。

「唔好意思要你摸門釘，頭先去咗見個朋友；」易拎行過我身邊，打開佢房門，「要入嚟嗎？」

我點點頭，跟咗佢入房，順手將閘門關好。

成間房唔似喺電視或網上見到嘅一樓一，唔見嗰啲粉紅粉紫嘅燈泡串，亦無避孕套或性玩具，甚至連俗套香水嘅氣味都聞唔到。

「我就快搬喇……始終唔做就唔好留喺度比較好……」易拎行到床邊，示意我坐低，「但我又怕……怕你搵唔到……依家見到你真係好……」

我估唔到我可以改變咗佢。望住佢雙眼，一種莫名嘅感動，陪隨剛才嘅無力感，有如高氣壓遇上低氣壓湧上心頭，我情不自禁走到易拎面前，將佢緊緊抱實。

突如其來嘅擁抱令佢重心不穩，我哋兩個就咁跌入床上。對於我嘅舉動，易拎不單止無出聲，反而雙手抱實我作為回應。

安全感油然而生，呢度頓然成為我心安之所，抱住一個明白我嘅女人。我整個人放鬆，唔再緊繃著神經，放低心頭嘅防禦。

兩串淚水就喺佢嘅膊頭，佢張床上，好似兩條靜悄悄嘅細河咁流落嚟。

曾經將佢嘅眼淚留低俾我，依家輪到我將我眼淚留低。

「我……我保護唔到手足……保護唔到大學……保護唔到呢個城市……」

易拎聽到後，一邊右手來回撫摸我後尾枕，一邊話：「你已經盡咗力，唔好責怪自己……」

「要喊就盡量喊，我喺度……」

於是，我盡力喺佢肩上流下眼淚。

直到第一百秒。

我稍稍離開佢嘅擁抱，同佢四目相視。我哋彼此曾經交換過體溫，交換過眼淚，交換過軟弱。當我見到佢眼中有我時，我好想從呢一刻開始將所有嘢同佢分享，甚至經歷將來嘅每一件事。

然後，兩人嘅嘴唇就像慢鏡一格一格接近。

就喺碰上前嘅一刻，外面有人係咁撳鐘。

我一下子被拉回呢個唔安穩嘅城市。

「去廚房匿埋，」易拎輕輕推開我，「等我打發佢走之後，我哋再……」佢整理好衣服，別過漲紅嘅臉蛋。

我聽完後，臉同佢一樣咁紅。

「小心……」

「放心，」佢指一指門口櫃邊嘅一個遙控器，「你入咗廚房後，我就打開呢間房嘅閉路電視錄低佢。」

我好想留低幫佢，但佢推咗我入廚房，我只好乖乖地等。

「我要叫雞，開門呀，臭西！」外面嘅人開始不耐煩咁一邊撳鐘，一邊拍門。

「麻甩佬！依家幾點呀？係度大嗌，呢度無雞叫好耐，過主喇！」

「臭西唔好吊高嚟賣喇！有客就擘大脾喇！」

「屌你喇！莫講話我已經唔做，就算其他姊妹見到你咁嘅態度，都唔會做你嘅生意！今晚，呀唔係，呢世注定你打飛機喇！」

「八婆！開唔開門？」

「開門？再嘈我報警！」

「報警？你打俾我呀？雖然我落咗更，但你都唔想我叫我啲伙記嚟。」

竟然係休班警！？

出面靜咗一陣… …

「開門喇！」

唔好開呀，易拎… …

喀嚓！

點解？！

唔通係因為我… …？

「挑！咪又係要乖乖開門！」

「做完唔該你快啲走！」

「嘿！我怕你食過翻尋味咋！」外面一陣除皮帶嘅噹啷聲。

我緊握住拳頭，究竟我應該點做？

衝出去？肯定被個差佬捉到正，浪費咗易拎嘅犧牲。

留喺度？我點甘心一個女仔喺我面前受辱？

猶豫之間，易拎大叫咗一聲。

就好似喺山上佢發惡夢時大叫咗一聲。

「全樓嘅人、幫襯過我嘅人，都知我從來唔錫嘴！」

拍！

「屌你喇臭西！邊有雞唔俾錫嘴！？」

「你理撚得我！走開！」

「我偏要錫！」

「呢度有閉路電視，影低咗你，快啲同我躝！」

「八婆！」

「放開我！」

「熄鳩咗個錄影先，等我碌嘢插到爬都爬唔起身時就洗晒佢。」

「救命！強姦呀！」

我保護唔到手足……保護唔到大學……保護唔到呢個城市… …

但我至少要保護到易拎！

我橫手擸咗前面個平底鑊，衝咗出去廚房。

「死黑警！」

我將所有嘅憤怒、不甘心同無奈都注入咗雙手，用力敲向休班警嘅頭上。

佢碌大隻眼，驚訝原來有第三個人，但喺佢反應過來之前，平底鑊已經嚟到佢頭頂上。

哇！

被扑中嘅休班警暈得一陣陣，腳步虛浮；我乘勢上前補多一「鑊」，佢就立刻瞓咗喺地。

「被人扑嘅滋味點呀？」我騎住已經倒地嘅休班警，「你依家知道手足嘅痛未？」

五年來嘅抗爭片段如潮湧上，以為已經哭乾眼嘅我再次流淚，我雙手再次握緊平底鑊柄，高舉過頭往下一揮。

低沉嘅骨裂聲… …

濺起一朵朵血花… …

「你知道我哋嘅痛未… …」我一邊抽泣一邊說。

忽然，一雙溫暖嘅手抱喺我腰上。

「已經完喇… …」易拎把臉貼在我背上，「你已經為你嘅手足報咗仇… …」

顫抖嘅雙手放開咗平底鑊，佢依然黐住喺變晒型嘅頭骨上。

「你快啲離開呢度。」易拎拉咗我起身，「快啲走。」

「點解你哋個個都要我走？」

「你殺咗人，唔走唔得。」

「易拎，」我拉住佢隻手，「咁你同我一齊走！」