啡站情緣（六）

返咗差唔多三個月工，今日係我第一次星期日放假。

點解？孤家寡人一支公，放邊日無所謂，但有啲同事要抽時間陪，有啲就抽時間陪屋企人，經理自自然就將我成日排星期六日或紅日假期返工。

本來未搬出嚟嗰時，有一班區內一齊讀書嘅朋友，不過搬咗出嚟後，物理上嘅距離遠咗，要搵個中間點聚聚難咗。

其實中學以後，我人生嘅路好似同班中學同學相差太遠。讀文憑時試過擺心機去維持，只不過當佢哋講自己間大學點點點時，我跟唔上話題；到我講我嘅嘢時候，佢哋又得個聽字。再加上佢哋一一拍拖，自己亦唔好意思打擾人哋。

於是，今朝晨早有人打過嚟，我真係好驚訝。

「你今日駛唔駛返工呀？」

「唔駛。」

「我係附近，好快就到。」

「咁早……」話口未完，手提嘅另一邊已經收線。

我臨急臨忙起身擦牙洗臉，除咗條孖煙囪，換返件Ｔ恤運動褲，未梳好頭就已經聽到有人係咁大力拍門。

「追債咩……」

我披頭散髮打開道大門，見到一個頭戴紅色紐約鴨舌帽，身穿白色短袖恤衫同黑色緊身牛褲嘅人，用佢隻紋咗幾朵又大又紅嘅玫瑰同黑色藤蔓嘅右手拍緊鐵閘。

佢見到我後放低右手，粗粗魯魯咁對我講：「開門啦，等咩嘢？」

「係咪一定要咁惡死睖瞪？」我往外推開道閘，「話晒都係你阿哥。」

「係阿哥就唔會搬咗出去都唔同自己細妹講。」佢無除到鞋就行咗入屋，望咗間屋兩望。

無錯。呢個中性化打扮嘅人就係我細妹——阿璇。

「你朝早返學，我就晏晝返工，你又一直住喺宿舍，點話你聽？」我閂好道門。

「梳化都無張，得張矮凳咋？點招呼女女呀？」我見佢大喇喇咁擘大脾坐喺矮凳上面。

「莫講話女仔啦，以前啲朋友都幾乎斷晒聯絡，唔似得你咁受歡迎。」我坐喺床邊同佢講。

「使唔使介紹啲俾你？」阿璇挑起眼眉望我，「學校有兩三個女仔各方面我都試過，全部都唔錯，絕對唔會老點你。」

「有心喇……啱你嘅未必啱我；」我耍手擰頭，「況且當我諗到呢個人以前同我細妹一齊過，肯定會有條刺。」

「你呢啲處男真係麻煩。」

「係咪要咁樣片你阿哥？」我用中指捽自己太陽穴，「今日咁早搵我做咩？」

「阿爸叫我嗌埋你返屋企搵日返屋企食飯。」

「佢唔打俾我？」

「覺得你忙卦？你知阿爸唔鍾意出聲；」阿璇除低鴨舌帽，掃一掃自己嘅露耳短髮，「分分鐘係阿媽借阿爸過橋要我哋返去。」

「十成九都係啦……」我伸個懶腰，「成日都係咁。自己收唔住把口搞到人唔高興，之後又要阿爸執佢啲蘇州屎。」

「你中學開始就住宿舍，讀書又好，梗係無受阿媽咁多閒言閒語。」我繼續投訴。

「我放假喺屋企住嗰時都受唔少喇；尤其當我剪短頭髮之後。」

「但你讀書成績好，又幫學校攞咁多獎，每次見家長有讚無彈，點都俾返你幾分薄臉。」

「妖，又講呢啲！」

「唔講囉……咁我睇下邊日大家得閒返去食飯。」

「咁我同返阿爸講嘞；」阿璇坐直個身，「一齊去食個早餐？」

「無所謂……去商場食？」

「你話事喇。」

「咁我換套衫行過去？唔想搭得嗰三個站咁嘥錢。」

「點話點好喇，成日都拖拖拉拉。」

於是，我喺衣櫃攞咗套出街衫，入廁所換完，就同阿璇出門食早餐。

我哋行過黃杏街市，嚟到零三啡站附近。見到女啡師忙緊沖咖啡，正想靜靜哋行過就算，點知佢快手拉完花一抬頭，就同佢四眼互望。

「今日又嚟飲咖啡呀？」女啡師用膠蓋冚好杯咖啡，順勢舉高手向我大叫，啡站周圍啲人都望過嚟。

「今日唔喇……」我好尷尬咁揮手回應，緊張到急急腳走開。

「我唔去商場食早餐，就喺度買個牛角包同咖啡。」阿璇忽然一手拉住我行近啡站。

我見阿璇一副鐵青臉，谷住谷住咁，就細聲同佢講：「去商場舒舒服服坐低慢慢食啦……食貴啲都無所謂，阿哥請。」

「我依家就係想喺呢度食。」阿璇講得好肯定，無轉彎餘地，「我想睇下呢條肥妹咩料。」

「吓？喂！」我未及反應，嗌都嗌唔住，已經嚟到收銀台前面。本來收銀嘅店員好識趣咁同女啡師換位，等佢嚟招呼我哋。

「又話唔飲？做咩過嚟？忍唔住呀？」女啡師嘲笑我，然後問阿璇，「呢位先生想要咩？」

「中杯美式，火腿芝士牛角包。」阿璇答得冷冰冰。

「哦！對唔住！原來係小姐。」女啡師一下子碌大咗對眼，不禁以笑遮醜，轉頭問我，「你呢？係咪照舊？」

「係……要多個杏仁牛角包。」

「你哋一個咸派、一個甜派喎；」佢邊講邊撳螢幕，「多謝一百蚊。」

我拍一拍信用咭俾錢，就拉阿璇行埋一邊。見阿璇眼定定咁望實女啡師，我唔敢去打擾佢。

「Stars！」經過上次嘅經驗，我知道係叫我，就同阿璇講：「我去攞嘢先。」

「叫你咩？」輪到阿璇碌大對眼。

「係呀……」

「咁快慣咗呢個名，肯定我改得好。」女啡師將嘢食同咖啡遞過嚟，「頭先唔知你個朋友係女仔，唔好意思。」

「唔緊要……」

「第一眼見到以為你係同性戀。」

「我似咩？」

「少少啦；」女啡師偷笑，「主要係一大清早同另一個人出嚟食早餐，除咗過夜就諗唔到其他。」

「佢係我親生細妹，唔好亂諗。」

「原來係咁……ＯＫ，以後唔會亂諗。」佢做咗個ＯＫ手勢，「唔阻你哋兩兄妹，我都要做嘢嘞，下次見。」

女啡師笑住同我揮下手，就轉頭去忙。我去返阿璇身邊問：「附近公園有野餐枱，不如坐嗰度食？」

「好。」佢無望到我，好似好認真咁諗緊嘢。

我好少見佢呢個石佛咁嘅臉，對上一次應該係我中五出事搵佢訴苦嗰時。

「你諗緊咩呀？」我同佢坐喺張長凳時問。

阿璇咬咗啖牛角包，飲咗口美式咖啡，僵硬嘅面容放鬆咗少少後問我：「你同個女啡師好熟？」

我將口入面嘅牛奶咖啡同杏仁牛角包吞落肚後答佢：「唔係呀……見過三次面，每次都係佢主動開口。」

「咁你唔覺得奇怪嘅咩？」

「少少啦……我有兩三次想唔出聲由個話題完，但佢都繼續講，咁我又唔好意思唔應佢。」

「咁你唔問佢點解嘅咩？」

「我估佢本身做侍應，可能慣咗咁樣，可以箍啲熟客卦……」

「箍客？你當人哋係雞咩？」

「唔……唔係，當然唔係喇。」

「我唔想你好似中學嗰時咁，被條八婆玩咋。」

「咁睇落佢咁好人，應該唔似許翊欣。」

「你仲叫個八婆叫得咁親切？唔記得佢點對你嘞？你呀一個大男人成日被女仔指指點點，點得嫁？好心你拎啲男子氣慨出嚟，唔好俾女人搓圓撳扁啦。」

「邊有？」

「都未見過你飲咖啡，肯定係被個肥妹仔氹落搭。係男人就主動約佢出嚟問清楚啦。」

「其實……佢講笑式咁約過我食飯，不過我推咗。」

「你真係比女人更加婆媽。」

「你夠比男人更加父權。」我唔忿氣反駁阿璇。

「係又點？我認呀！」阿璇得戚咁講，對佢嚟講可能係一種稱讚，「食完我哋去返啡站，等我幫你問清楚。」

「你咁樣會嚇親人……」

「咁你喺我面前，約佢出去講清楚。」