三月下旬，爸爸得到公事上得到提攜，被指派到大城市返工，於是我哋一家離開海邊古老嘅佐津市，搬到鄰縣首府嘅盛屋市。 喺駛往新地方嘅火車窗外，望見盛開而落、只剩低無數椏枝嘅櫻花樹，感覺就好似我一樣，所有嘢都要重新開始。 「佢係今年由佐津市內中學轉嚟嘅新同學，請各位同佢好好相處。」早會時班主任喺講台上將我介紹俾班上嘅同學，「你就坐嗰邊嘅空位。」 「請各位多多指教。」我向面前嘅所有人稍稍鞠躬後，行到自己座位坐低，準備上堂。 上完第一節課，一部分好奇心重嘅同學開始過嚟問我初中嘅事、點解會轉校、有咩喜好等；當刻，我感到人生新嘅一章應該唔會太差。 可惜，當所有同學都知道我呢個轉校生嘅一切背景，加上呢間學校係大學附屬中學嘅高校，即係幾乎所有同學喺初中時已經熟絡、有自己嘅圈子時，就開始減少對我嘅興趣。 我唔係無試過融入佢哋嘅圈子，只不過喺大城市出世嘅佢哋，鍾意喺商店街吃喝玩樂，而喺舊城市長大嘅我，對做工藝品比較有興趣，結果我只能安靜跟住佢哋，間中陪佢哋笑笑。 過咗一排，佢哋無再約我，而我亦唔係一個喺某方面特別突出嘅學生，所以除咗禮拜上嘅對話，就再無更多嘅交流。 除咗結城老師。 入學後第一個禮拜，學校為咗協助轉校生融入校園，將我分派到佢嘅輔導班下。每逢星期二同星期五放學後非值日嘅日子，都要到輔導室同佢講下學校及生活等呢啲話題。每次結城老師聽完只會點頭，或者喺我話語中深入問一啲問題，作為佢下次輔導嘅方向。 校內嘅霸凌問題因為各人都以升學為目標，所以並唔嚴重；另外從小戶外活動較多嘅我，長得算高大同強壯，再加上輔導老師無形嘅保護，第一學期嘅校園生活平平無奇但亦無任何壞事發生。 ※ 「暑假有咩計劃？」七月下旬，假期前最後一個星期五，結城老師問我。 「我……我未有計劃。」 「我知你對傳統手工藝有興趣，雖然學校未有呢啲社團，但類似嘅都唔少，點解唔參加？」 「我對社團活動無興趣。」 「有無特別鍾意邊門手工藝？」 腦內立刻湧起中三時觀賞過嘅展品，但我無回答佢。 「未有頭緒？」結城老師托起頭講，「雖然盛屋市係一個現代化嘅大都會，但都有一啲舊街老店。我呢度有啲資料，暑假得閒不如去逛逛？」佢將一啲小冊子同打咗圓圈嘅市內地圖放喺書檯上，推到我面前。 我拎起睇睇，的確係我會有興趣去嘅地方，有幾個更加已經吸引咗我眼球，盤算緊幾時同點樣去。 「見到你好似有興趣，作為輔導老師嘅我能夠幫到你，真係鬆一口氣。」喺我集中精神...
易拎掹出下體內嘅避孕套，打咗個結，將佢揼咗入浴室嘅垃圾筒。 「你仲唔著衫？」佢套返佢件大碼Ｔ恤，見我仲坐咗喺床邊，好奇咁問，「係咪想加鐘？」 「唔 …… 唔係 …… 」我拿拿淋攞起凳上嘅恤衫著返。扣緊鈕時，我諗起頭先嘅錯覺，於是問：「想問你剛才我哋做嘅時候，我有無咩奇怪？」 「奇怪？」佢一邊伸手入衫內清潔大腿內側，一邊答我。 「無？」我尷尬地擰轉臉，「我以為我一邊做一邊叫住一個女仔名 …… 」 「係呀，你有叫呀。」易拎依然無望我，專心保養佢賺錢嘅工具。 「吓？咁樣唔奇怪咩？」 「大把客都係咁喇！」易拎好似有些少恥笑我嘅無知，「嗌前女友名、嗌女明星名、嗌咸片女優名都聽過。」 「原來係咁 …… 」 「不過你有啲唔同。」 「點唔同？」 「好多人嗌名，俾我感覺佢係有意識知道自己叫緊雞；」易拎坐咗喺床頭講，「而你俾我覺得，你真係好似同緊『芯瑩』做緊愛一樣。」 聽到佢講「芯瑩」兩個字，忽然諗起海旁嘅對話，我不自覺低頭。 「多口講句，我好肯定你仲好鍾意個女仔，但既然分咗手就唔好勉強，搵個第二個喇。」 「想分手嗰個係我。」 「竟然？」易拎對自己嘅誤判有啲驚訝。 「但你無講錯，我真係仲好鍾意佢。」 「既然仲好鍾意佢，點解要分手？」 我將同芯瑩嘅故事，從頭由兩小無猜開始、到知道大家嘅距離、然後堅持喺埋一齊，到最後剛才海旁嘅對話，原原本本講晒被呢個只係相識一個鐘嘅女仔聽。 易拎聽完後沉思咗一陣，然後語重深長咁講：「同佢去英國喇。」 「但係 …… 」 「你已經超晒時，再講加你錢。」 我望一望鐘，原來已經喺度差唔多兩個鐘。 「唔好意思 …… 」我喺銀包攞晒入面嗰兩千蚊俾佢，「我得咁多。」 「到咗英國閒時寄啲手信同明信片過嚟當補數就得。」易拎接過兩千蚊。 「好 …… 好 …… 」 我行出咗門口，易拎將門牌轉返做「營業中」，臨閂門前講咗句「一路順風」。 連一個妓女都咁講，或者我應該同芯瑩離開呢度。 返到自己租嘅百幾呎嘅納米單位，一個連轉身都難嘅屋企，點會俾到芯瑩幸福？但係，如果真係過去英國，就算做啲洗碗執貨嘅下欄工，都唔會住得咁差，夜晚唔會有廣告射燈餘光，空氣又會好啲，可能心情都舒服啲，胸襟都廣闊啲。 爬到上格床瞓喺度，整晚精神同肉體嘅操勞立刻湧上嚟，我好快就瞓著咗。 ...