放課後的和菓子

確實嘅時間已經唔太記得，我諗應該喺小學尾、中學頭嘅階段。我哋四個人放學後一如以往相約於學校門口，聊聊當日返學嘅趣事或不如意，一齊穿過商店街、走過公園，最後嚟到十字路口前各自分道回家。

好多時為食嘅椿美會喺商店街嘅某個小食攤買嘢食。一盒三件唔同餡料嘅大福、一塊剛烤好嘅鯛魚燒，或是一碗新鮮嘅雜果刨冰，總之佢唔會兩手空空行入公園。好多時我哋見到佢食得津津有味，就會忍唔住陪佢一齊食。

「你每次都食呢啲小食，唔怕食唔到晚飯咩？」拓郎問佢。

「想食就食嘛，晚飯食少啲囉。」椿美答完後，舔舔嘴角嘅紅豆。

「我都想好似你咁，可惜阿媽話正餐先有營養，每次都要我食晒啲菜呀、飯呀。」拓郎撕開包裝紙，將有平糖放入口，「點解你次次都食章魚燒？邊行邊食嗰時啲燒汁好易滴落件衫，又唔容易食。」

拓郎問完，里子嘅校服立刻多咗一點污跡。

「鍾……鍾意食……無辦……辦法……」燙口嘅章魚燒令里子講嘢斷斷續續。

「話時話，次次我都要多謝焰君；」手中嘅今川燒消失後，椿美將肩膊挨近我，「每次我哋想食咩，你都會知點樣去、邊度最好食或者有新嘢試。」

「只係平時有留意街邊嘅宣傳。」

「平時有留意，定專登留意呀？」吞咗章魚燒嘅里子，講嘢立刻話中有意。

椿美瞇起雙眼，湊過臉來，一股今川燒嘅餘香撲鼻而來。

「咪… …咪亂講… …」我立刻橫跳一步，「我見到大家開心滿足，自己都高興之嘛… …」

三人見到我嘅窘態，唔係哈哈大笑就係偷偷竊笑。

「再唔行快啲，就唔夠時間喺晚飯前做完啲功課。」我急步向前，走出呢個尷尬嘅場面。

佢哋一邊笑，一邊跟住我走入公園。經過大門後嘅花圃、中央歐陸式嘅噴水池，我哋行到公園後山嘅鳥居前。

公園一部分沿山而建，鳥居就係上山道路嘅開始。聞說山上有荒廢嘅神社，雖然我哋經過無數次，但從未上過去一次。

當我哋快要離開鳥居，一陣微弱、陌生但舒服嘅清幽香味從鳥居後飄來。我本來無意理會，但椿美叫住我哋。

「好香！」椿美興奮大叫，「不如上去睇下！」

「係幾香嘅……但我哋又唔知上面有乜，而且上去落返嚟可能趕唔到晚飯……」拓郎聽落有啲心動，但唔太敢上去。

「呢條路我哋唔熟，加上太陽就嚟落山，不如下次先。」我附和拓郎話。

「條山路又長又斜，但想上去嘅話就唔應該怕辛苦。」里子探頭往鳥居後嘅山路望去。

「咪係囉！」椿美拉起里子嘅手，大步踏上山路，穿過鳥居隨住香氣往上走。

「等等！」我叫唔住佢哋，只好回頭向拓郎揚手，「一齊上去！只得佢哋兩個女仔可能有危險。」

拓郎猶豫不決，於是我再次催促，佢先跟我走上山路。

我以最快速度追上去，盡量記住沿途嘅特徵，一邊小心唔好留低落後嘅拓郎，一邊盡量將椿美同里子嘅背影留喺視線之內。

無耐山路同兩個女孩喺前面消失，我焦急咁大叫：「椿美！里子！」又回頭催拓郎：「跑快啲啦！」

終於跑到山路嘅盡頭，眼前係一塊被樹林包圍嘅草地；椿美同里子企咗喺我左邊近處，右方有一間古老嘅茶室。一個身穿深藍色僧服嘅和尚正跪喺躙口處沏茶。香氣似乎除咗抹茶嘅清香，應該仲有佢旁邊剛剛燒好嘅年糕傳出嚟嘅炭香。

「大家無事嘛？」拓郎喘住氣講，但我哋眼定定睇住和尚嘅舉止，無回應到佢。只見和尚低頭凝視茶碗，右手用茶筅不斷攪拌，神情莊嚴卻又優雅，令人心曠神怡。

「不如落返去……」拓郎唔敢太大聲，生怕破壞氣氛。我輕輕點頭，正要拉兩個女孩走嘅時候，和尚停止攪拌，將茶碗放喺右手前面。

「既然與四位有緣，且茶剛點好，何不稍作品嘗？」和尚將茶碗嘅正面花紋朝向我哋旋轉，左手手掌輕托碗底，右手​​輕撫茶碗，似係為我哋敬茶。

和尚面容和藹，唔似有惡意，加上誠意邀請，拒絕似乎不合禮儀。見椿美已經蠢蠢欲試，於是我決定擋喺佢身前，走過去試茶。

「有咩事立刻帶佢哋兩個落山。」我吩咐拓郎。

我行到躙口前，接過正跪坐嘅和尚遞上嘅抹茶，細小咁呷咗一啖，苦味一湧而上，卻又來得快去得快；彈指間剩低一股有如昆布牡蠣湯嘅鮮味散喺舌頭上。鮮味幾秒後消去，留低清澈而微弱嘅回甘喺口腔迴響，直至樹葉飄落到草地上才完全消失。

完全意料唔到一口茶能夠俾我呢種豐富而有層次嘅感覺，令我目定口呆咁企咗喺度，直到椿美推一推，我先回神過來。

「你無事嗎？」椿美擔心咁問。

我搖搖頭。

「茶好唔好飲？」

我點點頭。我好似怕一開口，會唔記得茶嘅味道。

「俾我試試？」

我將茶碗遞俾椿美，佢飲咗一口，然後呆呆咁望住我。

「你兩個無嘢嗎？」拓郎關心問。椿美無回答，只係將茶碗遞過去。

拓郎接過茶碗，試咗一啖，同樣講唔出聲。里子見狀，將茶碗搶過來，大口把茶飲光，然後被濃郁芳香茶味震懾嘅四人只能面面相覷。

「茶室內有菓子，四位要嘗嘗嗎？」

我哋默不作聲，帶住好奇同期待，及一點點害怕，彎身穿過比我哋更細嘅躙口，入咗去茶室嘅待庵。和尚伸手指向躙口左邊深處嘅四塊蒲團，示意我哋往嗰邊。我哋跟住拓郎咁微微鞠躬道謝後，四個細路就恭恭敬敬跪坐喺蒲團上。

和尚見我哋坐好，自己就坐喺我哋面前一個大木魚後嘅蒲團上。佢身後嘅室床掛起一幅高長嘅竹林水墨畫，配上茶室米褐色嘅方牆，及牆上圓形木框嘅紙窗，肅穆卻又令人心境平和舒服，帶走咗最後嗰一絲害怕。

（依家諗返起，應該只有嗰個年齡嘅我哋先會咁。）

待庵內五個人跪坐咗一段時間，我哋奇怪和尚點解仲未端出菓子來，開始有啲不耐煩，但又唔敢出聲。終於，椿美忍唔住開口問。

「請問……」

「咚！」

和尚喺椿美嘅問題完結之前，大力敲響咗一下木魚。

「吾之菓子名夢，諸位只要合眼細想，便於面前出現。」

「咁……大概要諗啲乜嘢……？」椿美被嗰下木魚聲嚇咗一嚇，講嘢變得戰戰競競。

「諸位可以思考將來人生要怎樣過。」

作為一個細路，被和尚問往後幾十年嘅人生要點樣，實在完全無頭緒。瞇埋眼後我只有一團雲霧，完全沒有一個方向。

無耐和尚開始唸起經來，呢喃之聲令腦海內嘅雲霧薄咗一點，但依然無亮起一盞燈。

「咚！」

和尚又敲起木魚，我睜開眼，望見椿美、里子及拓郎膝前各自放咗一碟和菓子。

「嘩！」椿美第一個興奮叫起嚟，「水信玄餅！」

「真係諗到乜就有乜！」佢急不及待，不顧儀態及呢個嚴肅嘅場合，拎起竹匙潷嚟食。

見到椿美比平時食得更加津津有味，更睇得我心花怒放。

「里子，你嘅糕點好唔好食？」椿美問。

剛剛食咗一口嘅里子稍稍繃緊五官，看似唔太鍾意；猶豫一陣後，佢決定再咬第二啖，我卻見到佢嘴角有一絲會心微笑。

「好神奇！」里子興奮話，「食第一啖時覺得好重草藥味，本來唔想再食；但過一陣好似之前碗茶咁有一陣甜。再食先知苦中帶甜，好似上堂學嗰句……」

「苦盡甘來！」

「無錯！」里子笑住說，「而且令我有種莫名其妙嘅感動。」

兩個女孩相視而笑後，卻見到拓郎只係望住眼前嘅羊羹。

「你唔食？」椿美問。

「唔……唔係……」拓郎拎起一塊放入口。

里子向我望來，正好同我對望。其實我同里子都知道，拓郎最鍾意唔係羊羹。比起生菓子，佢較鍾意食落雁、卵松葉呢類乾菓子。羊羹好多時只係附和著佢父母而食。

「好……好食。」佢勉強擠出一個笑容，然後有啲驚訝咁同我講，「點解你乜嘢都無？」

佢哋呢一刻發現，唯獨我面前空無一物。

「點解焰君乜嘢都無？」椿美帶住些少責問嘅語氣，為我向和尚抱不平。

「諸位何不問問該施主呢？」

三人立刻望向我。

我望住佢哋三個。我見到椿美嘅笑逐顏開，好想保護及延續佢；見到里子苦盡甘來嘅微笑，好想陪住佢渡難關；見到拓郎嗰刻嘅苦笑，好想幫助同扶持佢。

剎那之間，剛才嘅雲霧內有盞燈點起；或者我自己唔需要甚麼，有身邊嘅佢哋已經足夠。

「你哋咪係我嘅糕點囉，見到你哋食得開心我就開心。」

「咁點得架？！」椿美跳出薄團，攞起盛著水信玄餅嘅竹船走過嚟，「你同我一齊食。」

「唔使喇… …」

「你唔同我一齊食我唔開心架！」

「我都分塊草餅俾你。」

「仲有我份羊羹。」

「自己最鍾意唔係羊羹，想推俾阿焰？」

「原來你唔鍾意羊羹？咁我可唔可以食埋你個份？」

「你分咗份玄餅俾我，想喺拓郎嗰度補返？」

「沒收！沒收！」椿美瞪咗我一眼，並伸手想攞返份玄餅。

我手快一步將佢拎起咬咗一口：「太遲喇。」

里子同拓郎見到我哋打打罵罵，大笑起來。

雖然茶室莊嚴，但我哋四人以最純真嘅心情，一邊分享面前三份和菓子，一邊聊天說笑。

直至茶室外一聲暮鐘響起，……

躪口細小嘅木門被拉開，比木門高一倍嘅椿美、里子同拓郎陸續跪身鑽入茶室，向我揮手問好。

「焰君！真係好似嗰次公園後山上嗰間茶室，你哋仲記唔記得… …」

（首發於德尼思化五月創作會，結尾修於翌日早晴。）